Нью Йорк Таймс рўзномаси Ироқ урушининг таъсири борасида Америка жосуслик хизматлари томонидан тайёрлангани айтилган ҳисоботнинг хулосаларини чоп этган.
Рўзноманинг ёзишича, ҳисоботда дунё бўйлаб терроризм хавфининг кучайиши ва исломий радикализмнинг ўсишида Ироқдаги уруш сабабчи экани айтилади. Бундай хулоса Оқ Уйнинг Ироқ уруши дунёни анча хавфсиз қилди, деган даъволарига зиддир. Нью Йорк Таймс рўзномаси ҳисоботнинг ўзини кўрмаган, аммо уни тайёрлаган одамлар билан суҳбатлашганини айтган. Би-би-сининг мудофа масалалари бўйича мухбири Роб Уотсонга кўра, АҚШ жосуслик хизматлари Ироқдаги уруш исломий экстремизмни янада алангалатиб юборганини биринчи марта айтишлари эмас. Амалда бу хизматлар Америка Ироқни ишғол этишидан олдин ҳам бу ҳақда огоҳлантирганлар. Аммо сўнгги ҳисобот АҚШнинг барча 16 та жосуслик идораларининг таҳлилига асосланган, биринчи тугал ҳисоботдир. Нью Йорк Таймсга кўра, Ироққа ҳужум ва унинг ишғол қилиниши дунё бўйлаб исломий радикалларнинг янги авлодини пайдо қилган. Ҳисоботда айтилишича, Ироқ урушидан уйларига қайтиб борган исломий жангарилар худди 1980-йилларда Афғонистонда Совет Иттифоқига қарши урушган мужоҳидлар сингари ўз мамлакатларида жиҳод ғояларини ёйишлари мумкин. Ал-Қоида таҳдиди Хулоса қилинишича, Ал-Қоида 2001-йил 11-сентябр ҳужумларидан сўнг заифлашган бўлиши мумкин, аммо дунё бўйлаб радикал исломий ҳаракат қайтага кучланган. Улар Усама Бин Лодиннинг тўғридан-тўғри қўмондонлиги остида бўлмаслиги мумкин, аммо ундан илҳомланган турли гуруҳ ва тармоқлар шаклида фаолият олиб бормоқда. Президент Буш ўзининг сўнгги чиқишларида Ироқ урушини "террорга қарши глобал урушдаги марказий жабҳа" дея тасвирлаётган эди. Ўтмишда жаноб Буш "террористлар Ироқ ёки Афғонистондаги урушдан анча аввал Америкадан нафратланишар эди" дея ҳисоботда келтирилгани каби тахминларни рад этган
| 