Аммо ҳозирда премер-лигага на "МЮ" ва на "Челси" етакчилик қилмоқда.

Ўтган йили премер-лига билан хайрлашишига бир баҳя қолган "Портсмут" жамоаси барча футбол мухлислари, шарҳловчию таҳлилчиларни том маънода лол қолдирган ҳолда, бу йилги чемпионат карвонбошисига айланиб олган.

Премер-лига бошланишидан аввал асосан "ёши ўтиб қолган", аммо иқтидорли футболчиларни ўзида тўплаган "Портсмут" ўтказилган беш учрашувдан тўрттасида ғалабага ва биргина учрашувда дурангга эришди.

Аммо жамоа мураббийси Ҳарри Редкнап "Портсмут"нинг бу муваффақияти узоққа чўзилишига кўзи етмаслигини эътироф этади.

Таҳлилчилар бу йил ғолиблик шоҳсупаси учун асосан тўрт жамоа - "Челси", "Манчестер Юнайтед", "Арсенал" ёки "Ливерпул" - даъвогар бўлишини башорат қилишган.

Аммо мухлисларнинг аксари бу йил ҳам "Челси" ғолиб бўлишини айтишади.

Бундан уч йил муқаддам россиялик миллиардер Роман Абрамович томонидан 140 миллион фунт стерлингга сотиб олинган "Челси" ҳозирда дунёнинг энг кучли жамоаларидан бирига айланган.

Бу йил "Челси" сафига украиналик Андрей Шевченко ва олмониялик Майкл Баллак сингари дунёнинг энг "қимматбаҳо" ўйинчилари келиб қўшилишган.

Жозе Моурино шогирдлари бу йил премер-лига кубогини қаторасига учинчи бор қўлга киритиш билан бир қаторда Оврўподаги энг нуфузли - "Чемпионлар Лигаси" беллашувларида ҳам ғолиб бўлишга бел боғлашган.

Бироқ футбол шарҳловчилари "Челси" бу мавсумда ўтган йилги ҳужумкор ўйинларини кўрсата олмаётганини айтишади.

Ҳозиргача "Челси" беш учрашувдан тўрттасида ғалабага эришган бўлса ҳамки, жамоа кўрсатаётган маҳорат даражасини ўтган мавсум даражасида деб бўлмайди.

"Қизил девлар" номи билан машҳур "Манчестер Юнайтед" бу йил "Челси"дан чемпионликни тортиб олишга астойдил бел боғлаган.

Сэр Алекс Фергюсон шогирдлари якшанба куни "Арсенал" га ўз майдонларида 1:0 ҳисобида ўйинни бой бериб қўйишган эсалар-да, бу гал "тегирмон навбати" уларга етганини таъкидлашдан чарчашмаётир.

Аммо мавсумнинг илк ғалабасига эришган "Арсенал" жамоаси ҳали чемпион бўлиш шаштидан қайтмаганини айтади.

Шундай эсада, футбол таҳлилчилари "ёшариш даври"ни бошдан кечираётган "Арсенал" бу мавсумда чемпионлик учун тўлақонли даъвогар бўла олмайди, деган фикрдалар.

Чемпионликка даъвогарлардан яна бири "Ливерпул" жамоаси "Арсенал" сингари мавсумни ўта бўш бошлади. Аммо "Ливерпуль" мухлисларини тинчлантиришга уринган жамоа мураббийси Рафа Бэнитес премер-лига беллашувлари энди бошланаётгани айтади.

Нима бўлганида ҳам, дунёнинг энг кўп томоша қилинадиган чемпионати ғолибини аниқлаш учун ҳали яна бир йилча вақт бор.

Шарҳловчилар айтмоқчи "копток юмалоқ, майдон эса тўртбурчак".

Футболда эса ҳар қандай натижани кутса бўлади.