Тунлари уйқусиз ўтириб хомуш,
Асабни эговлаб қиласиз ўйин.
Сайтларни ковламанг мисли каламуш,
Компютер олдини бўшатиб қўйинг!

Ўзингиз саноқли мухолифатсиз,
Ватанни тарк этиб хорижда юрган.
Бирлашинг, бўлинманг, яқин улфатсиз,
Турли ўлкаларда ҳамнафас турган!

Ўзбекистон қаҳрамонига

Кўчалар бекилди, катта йўл очиқ,
Миршаб машинаси пишқириб ўтди.
Ҳатто йўлаклардан одамлар қочиб,
Жимжитлик қаърига йўқолиб кетди.

Миш-мишлар тарқалди қулоқма-қулоқ,
"Каттакон" келяпти бизлар томонга.
Миршаблар саф тортди, қўлларда таёқ,
Бир бало бўлмасин,- деб қаҳрамонга.

Ғаройиб уловлар визиллаб ўтди,
Кимнингдир ўртада сақлаб жонини.
Манзилда вакиллар гулдаста тутди,
Кутиб Ўзбекистон Қаҳрамонини.

Исроил Холдоровга
Йиртқичлар тишини қайраб,
Ов қилар, қўшни юртда.
Соғлом фикрни пойлаб,
Кезар хона ва юрта.

Йиртқич қонсираб қолди,
Қутурган итлар каби.
Дўстимни асир олди,
Қонга тамшаниб лаби.

Ўғирлаб кетди нетай,
Катта аждар ёнига.
Муҳтож экан у атай,
Исроилни қонига.

Қидирмоқда мени ҳам,
Дўстим қонига қонмай.
Кечалари дамба- дам,
Қунғироқ чалар тинмай.

Номаълум жимлик, завол
Қирғизистон юртида.
Шивирлар сирли шамол,
Деразанинг ортида.

Увиллашар бўрилар,
Итларга тутиб мотам.
Тушларимда кўринар,
Марҳум онам ва отам.

Яшайман дуо қилиб,
Ўтганларнинг руҳига.
Талпинаман интилиб,
Оллоҳнинг паноҳига!