Гувоҳларнинг айтишларича, фуқаро кийимидаги милиция ходимлари кўчаларда патруллик қилмоқда ва қуролли аскарлар ҳукумат биноларини қўриқлашаяпти.

Туркманистоннинг миллий хавфсизлик вазири аҳолини осойишталикка чақирди ва жума кунги телевидение орқали чиқишида мамлакатнинг муваққат Президенти Қурбангули Бердимуҳамедов Туркманбошининг изидан боришга ваъда берди.

Гарчи жаноб Ниёзов ўзидан қашшоқлик ва абгор таълим ҳамда соғликни сақлаш тизимини мерос қолдирган эса-да, ҳозирда кўпчилик туркманистонликлар эшитишни хоҳлаган нарса ҳам шу.

Ўз номини ошкор этишни истамаган ашхободлик бир талаба у билган ҳамма Президент Ниёзовнинг ўлимидан ларзага келгани, юракдан қайғураётгани ва мамлакатда беқарорликлар бошланиб кетишидан хавотирда эканини айтди.

Мутлақ ҳукмдор

Ўтган йигирма йил давомида жаноб Ниёзов шахсга сиғинишнинг мисли кўрилмаган намунасини яратди.

У ўзига олтиндан ҳайкал қурдирди ва ойлар номини ўзи ва оила - аъзолари номи билан атади.

Туркманбоши мутлақ ҳукмдор эди ва мамлакатнинг улкан газ заҳираларини унинг бир ўзи назорат қилган.

У ўзидан кейин амал қиладиган сиёсий институтлар ва аниқ бир меросхўр қолдиргани йўқ.

Кузатувчиларга кўра, ҳозирнинг ўзидаёқ ҳокимият учун курашнинг белгиларини кўрса бўлади.

Ташқи дунё Туркманистондаги воқеалар ривожини яқиндан кузатмоқда, чунки у ерда нима бўлиши Оврўпога газ таъминотидан тортиб, Афғонистондаги уруш ва бутун Марказий Осиёдаги унчалик ҳам барқарор бўлмаган вазиятга таъсир кўрсатади.